22 Meán Fómhair 2017

Breathnaigh ar an eisiúint: Suirbhé Ráithiúil Náisiúnta ar Theaghlaigh - Ráithe 2 2017 [EN]

Tá torthaí eisithe ag an bPríomh-Oifig Staidrimh (CSO) inniu (22^ú Meán Fómhair 2017) ón Suirbhé Ráithiúil Náisiúnta ar Theaghlaigh (QNHS) do Ráithe 2 2017. Léirítear sa tuairisc seo na torthaí do R2 2017 taobh le sonraí inchomparáide do bhlianta roimhe seo.

Ag tagairt don eisiúint, deir Jim Dalton, Staitisteoir: “Is í an QNHS an fhoinse oifigiúil sonraí maidir le fostaíocht agus dífhostaíocht in Éirinn.

Léiríonn na príomhthorthaí do R2 2017 gurbh ionann líon iomlán na bhfostaithe agus 2,063,000, méadú de 2.4% nó 48,100 duine i gcomparáid leis an ráithe céanna in 2016. Le coigeartú déanta de bharr tionchair shéasúracha, tháinig méadú 0.2% nó 3,300 duine ar líon na ndaoine i bhfostaíocht ó R1 2017.

Bhí 141,500 duine dífhostaithe ann i R2 2017 - laghdú de 24.7%, ionann le 46,300 duine, ó bhí R2 2016 ann. Coigeartaithe de réir séasúir, tháinig laghdú ar an ráta dífhostaíochta ó 6.8% go 6.2% le linn na ráithe. B’ionann líon na ndaoine dífhostaithe don ráithe is déanaí seo, coigeartaithe de réir séasúir, agus 136,700 – an líon ba lú ó bhí R2 2008 ann, tráth a raibh figiúir inchomparáide de 127,200 duine dífhostaithe.

B’ionann le dífhostaíocht fhadtéarmach, a shainítear mar an líon daoine dífhostaithe ar feadh bliana nó tréimhse níos faide, agus 48.7% den dífhostaíocht iomlán i R2 2017, i gcomparáid le sciar 51.1% an tréimhse céanna aon bhliain roimhe sin.

Ar deireadh, is ionann an líon daoine atá sa lucht saothair agus 2,204,500 duine, méadú 0.1% nó 1,800 duine ó bhí R2 2016 ann. Tá 1,477,400 duine nach bhfuil sa lucht saothair, méadú 3.0% nó 42,500 ar an dtréimhse chéanna aon bhliain roimhe sin.”

Tabhair aird, le bhur dtoil, go mbeidh suirbhé úr, Suirbhé ar an Lucht Saothair, ag teacht isteach in ionad an Suirbhé Ráithiúil Náisiúnta ar Theaghlaigh ó R3 2017 ar aghaidh. Féach an nóta faisnéise ábhartha i dteannta an phreasráitis seo chun teacht ar a thuilleadh eolais.

-- CRÍOCH --