25 Lúnasa 2020

Breathnaigh ar an eisiúint: Suirbhé ar an Lucht Saothair, Ráithe 2 2020 [en]

Breathnaigh ar eisiúint: Feasachán Léargais ar an Margadh Saothair, Eagrán 1: Ráithe 2 2020 [en]

Tá torthaí foilsithe inniu (25 Lúnasa 2020) ag an bPríomh-Oifig Staidrimh (CSO) ón Suirbhé ar an Lucht Saothair (SLS) le haghaidh Ráithe 2 2020.

Déanann Jim Dalton, Staitisteoir, trácht ar eisiúint an lae inniu: “Tá tionchar thar a bheith mór imeartha ag an bpaindéim COVID-19 ar margadh saothair an Stáit agus bhí rian an tionchair sin le braith faoi dheireadh Ráithe 1 2020. Ós rud é go bhfuil sé d’oibleagáid ar an Oifig sainmhínithe agus modheolaíochtaí caighdeánacha a úsáid le meastacháin oifigiúla an tSuirbhé ar an Lucht Saothair a ríomh, tá cinneadh glactha na meastacháin SLS le haghaidh Ráithe 2 2020 a chur i dtoll a chéile ar an ngnáthbhealach agus Meastacháin Coigeartaithe COVID-19 faoi leith a chur ar fáil in éineacht leo. Ar an gcaoi seo, coinnítear modheolaíocht an SLS slán agus ag an am céanna tá eolas trédhearcach á sholáthar faoin tionchar reatha ag COVID-19 ar an margadh saothair in Éirinn.

De réir gnáthchritéir an ILO, is é an líon neamhchoigeartaithe daoine in aois 15 bliana agus os a cionn i bhfostaíocht ná 2,222,500 i R2 2020 le Ráta Fostaíochta comhfhreagrach de 65.7% i measc daoine 15-64 bliana d’aois.

Nuair a thógtar éifeachtaí COVID-19 san áireamh, meastar faoin Tomhas Coigeartaithe Fostaíochta COVID-19, an luach féideartha is ísle de dhaoine 15 bliana d’aois agus os a cionn i bhfostaíocht, go raibh 1,783,567 duine fostaithe faoi dheireadh mí an Mheithimh agus go raibh Ráta Coigeartaithe Dífhostaíochta COVID-19 comhfhreagrach de 52.2% ann do dhaoine 15-64 bliana d’aois. Faoi dheireadh mí Iúil, meastar an dá táscaire seo a bheith ionann le 1,947,922 agus 57.2% faoi seach.

De réir gnáthchritéir ILO, is é an líon neamhchoigeartaithe daoine in aois 15-74 bliana a bhí dífhostaithe i R2 2020 ná 118,700 le Ráta Dífhostaíochta comhfhreagrach de 5.1%.

Ar an 05 Lúnasa 2020, mar chuid d’eisiúint na hOifige ar Mheastacháin Dífhostaíochta Míosúil le haghaidh Iúil 2020, foilsíodh Toirteanna agus Rátaí Dífhostaíochta Coigeartaithe COVID-19 mar a bhí ag deireadh Meitheamh 2020. De réir na heisiúna sin, 531,412 daoine a bhí dífhostaithe agus ráta 23.1% a bhí i gceist do dhaoine in aois 15-74 bliana ag an am. Faoi dheireadh Iúil 2020, meastar gur 386,935 daoine agus ráta 16.7% a bhí i gceist.

In R2 2020, de réir na gnáthmhodheolaíochta, 2,341,200 ab ea an líon iomlán daoine sa lucht saothair, laghdú 3.7% nó 89,600 le hais R2 2019. Bhí líon 1,632,600 daoine nach raibh sa lucht saothair i R1 2020, méadú 10.2% nó 150,800 ar an ráithe chéanna bliain roimhe.”

Maidir leis an tábhacht atá le daoine roghnaithe páirt a ghlacadh san SLS, dúirt Jim Dalton: “I gcomhréir le treoirlínte sláinte poiblí a bhaineann le COVID-19, níl ár n-agallóirí ag tabhairt cuairt ar dhaoine sa bhaile. Ina áit sin, tá agallaimh ar an nguthán á ndéanamh acu. Faigheann líonta tí roghnaithe litreacha roimh ré ag iarraidh orthu teagmháil a dhéanamh leis an agallóir chun am a shocrú le haghaidh agallaimh.

Is foinse eolais fíorthábhachtach iad na suirbhéanna seo as a n-eascraíonn léargas ar an staid shóisialta agus geilleagrach ina bhfuil muintir na hÉireann ar leibhéal cruinnis nach bhféidir a shárú. Má dhéantar teagmháil le haon duine chun páirt a ghlacadh i suirbhé de chuid na hOifige, iarraim orthu amhlaidh a dhéanamh chun leasa na tíre. Is féidir libhse, muintir na hÉireann, braith ar chruinneas fhigiúirí CSO toisc gur inis sibh dúinn iad an chéad lá.”

Ag tagairt d’eisiúint nua atá á fhoilsiú inniu in éineacht leis na torthaí SLS, deir Edel Flannery, Staitisteoir Sinsearach: ‘Tá foireann Margadh Saothair na hOifige ag foilsiú feasachán nua inniu, an chéad cheann i sraith úr d’fheasacháin ina ndéantar cíoradh ar thionchar COVID-19 ar an margadh saothair. Tá sé i gceist leis an bhfeasachán a thuilleadh léargas agus anailís a chur ar fáil faoin tionchar atá imeartha agus á imirt ag COVID-19 ar an margadh saothair sa Stát. Faightear an buneolas ón SLS mar aon le tacair sonraí riaracháin agus déantar iad a nascadh. I gcás feasachán an lae inniu, tá comhthéacs maidir le gnáth-thorthaí an SLS le haghaidh R2 2020 (https://www.cso.ie/en/releasesandpublications/br/b-lfs/labourmarketinsightseries1q22020/). Leagfar béim ar ghnéithe eile den margadh saothair le feasacháin eile amach anseo.”

-- CRÍOCH --