11 Feabhra 2021

Breathnaigh ar an eisiúint: Clúdach Pinsin 2020 [en]

Tá torthaí foilsithe ag an bPríomh-Oifig Staidrimh (CSO) inniu (11 Feabhra 2021) ón suirbhé ar Chlúdach Pinsin 2020, a reáchtáladh i Ráithe 3 anuraidh.

Déanann Maureen Delamere, Staitisteoir, trácht ar fhoilseachán an lae inniu:

"Tá athruithe ó bhonn tagtha ar an saol in Éirinn ó tugadh isteach bearta cosanta sláinte le linn 2020 chun dul i ngleic leis an bpaindéim COVID-19, ar a n-áirítear dúnadh iliomad láthair oibre agus cailliúintí poist dá bharr. Le linn dúinn a bheith ag bailiú eolais don suirbhé seo ó fhreagróirí i Ráithe 3 anuraidh, bhí srianta éagsúla COVID-19 i bhfeidhm. Baineann torthaí an fhoilseacháin leo siúd a bhí i bhfostaíocht amháin – ní áirítear aon duine a bhí dífhostaithe ag an am nó as obair de bharr na paindéime. Déantar tagairt sna torthaí do chlúdach pinsin forlíontach amháin, .i. aon chlúdach nach é an pinsean stáit é.

Astu sin a bhí i bhfostaíocht i Ráithe 3 2020, bhí clúdach pinsin de shaghas éicint, seachas an pinsean stáit, ag 64.7%. B’ionann seo agus ardú de bheagnach 5 pointe céatadáin ar an bhfigiúr comhionann in 2019.

Feictear ardú ar an sciar oibrithe le clúdach pinsin i ngach aoisghrúpa i R3 2020 le hais R3 2019, ach tá mórán an treocht céanna aoise i gceist sna torthaí is déanaí. Is é an aos óg an dream is lú clúdach pinsin, gan fiú aon cheathrú (24.4%) d’oibrithe 20-24 bliana d’aois a raibh sé acu. I gcomparáid leis sin, bhí clúdach ag leath (49.9%) d’oibrithe 25-34 bliana d’aois. Téann an treocht in airde le haois, mar sin bhí 72.7% díobh siúd san aoisghrúpa is sine, 55-69 mbliana, le clúdach pinsin. Is scéim ranníocaíochta sainithe (63.9% de phinsin) seachas scéim sochair shainithe (33.8%) atá ag an gcuid is mó d’oibrithe.

Ag breathnú ar ghrúpaí leathana ceirde, is ag Gairmithe a bhí an ráta is airde clúdach pinsin, sin 86.4%. Lena ais sin, ní raibh clúdach ach ag beagán le cois aon trian (34.0%) d’Oibrithe Miondíola agus Seirbhís Custaiméara. De réir earnáil geilleagrach NACE, bhí an ráta clúdaithe is airde in 2020 ag oibrithe i Riarachán Poiblí agus Cosaint (95.8%). Tá córas éigeantach pinsin do na hoibrithe seo agus iad ag tosú sa phost.

I measc oibrithe gan clúdach pinsin, deir 35.3% díobh gur ceist acmhainní a bhain lena n-easpa clúdach pinsin, agus deir 37.0% eile nach bhfuair siad an t-am chun clúdach a shocrú dóibh féin. Iarradh ar oibrithe idir 20 agus 69 mbliana d’aois (lena n-áirítear daoine féinfhostaithe agus/nó ag tabhairt cúram do ghaolta) nach bhfuil clúdach pinsin acu cén fhoinse ioncaim a bheadh siad ag braith air théis dul ar scor. An pinsean stáit ab ea an freagra ba choitianta, 57.6%, agus dúirt duine as dáréag acu go mbeidís ag braith ar airgead i dtaisce nó infheistíochtaí."

-- CRÍOCH --