11 Nollaig 2020

Breathnaigh ar an eisiúint: Suirbhéireacht Sláinte na hÉireann 2019 - Príomhthorthaí [en]

Tá sonraí foilsithe ag an bPríomh-Oifig Staidrimh (CSO) inniu (11 Nollaig 2020) ar na Príomhthorthaí ó Shuirbhéireacht Sláinte na hÉireann 2019.

Déanann Keith McSweeney, Staitisteoir Sinsearach trácht ar an bhfoilseachán:

“Féintuairisciú ó dhaoine 15 bliana d’aois agus níos sine atá mar bhonn ag an bhfoilseachán inniu. Léirítear ann an dearcadh atá acu féin ar a stádas sláinte – cén chaoi a bhfuil siad ag aireachtáil, an oiread plé a bhíonn acu leis an gcóras sláinte in Éirinn, roghanna pearsanta a dhéanaimid go léir faoi rudaí a imríonn tionchar leanúnach agus soiléir ar an sláinte - caitheamh tobac, alcól a ól, aclaíocht rialta.

Bailíodh na sonraí don tSuirbhéireacht idir Iúil 2019 agus Feabhra 2020, mar sin tugann siad léargas dúinn ar thaithí sláinte sa tír roimh na paindéime. I mbliana, tá torthaí na Suirbhéireachta roinnte ina trí chuid; foilseachán an 07 Nollaig maidir le Cúramóirí agus Tacaí Sóisialta, ceann an lae inniu maidir leis na Príomhthorthaí agus ceann Dé Luain an 14 Nollaig a bheidh dírithe ar an stádas sláinte ag daoine le míchumas.

Tuairiscíonn 26% de dhaoine 15 bliana d’aois agus níos sine go bhfuil riocht sláinte fadtéarmach orthu. É sin ráite, deir 82% den iomlán nach bhfuil aon teorainn lena ngníomhaíochtaí laethúla de bharr fadhb sláinte. Tá sé níos coitianta ag baineannaigh dul i muinín an tseirbhís sláinte choisctheach ná atá ag fireannaigh; thug 82% de mhná agus cailíní cuairt ar dhochtúir teaghlaigh sa 12 mhí sular ceistíodh iad, i gcomparáid le 68% d’fhir agus buachaillí.

Léirítear san fhoilseachán seo chomh maith an stádas sláinte níos ísle atá ar dhaoine dífhostaithe le hais daoine i bhfostaíocht, de réir na daoine iad féin. Tá drochshláinte intinne níos forleithne i measc daoine dífhostaithe; tá breis is aon chúigiú (21%) de dhaoine dífhostaithe a thuairiscíonn dúlagar de chineál éigean a bheith orthu agus níos lú ná an deichiú chuid (9%) de dhaoine i bhfostaíocht a deir amhlaidh.

Tá ragús óil níos coitianta i measc daoine óga ná ag daoine níos sine. Bíonn 6 thomhas óil nó níos mó ag 48% de dhaoine 15-24 bliana d’aois uair sa mhí ar a laghad, dhá oiread den sciar 24% daoine 55-64 bliana d’aois a ólann an méid sin ar bhonn míosúil.

Tá móramh daoine 15 bliana d’aois agus níos sine in Éirinn (56%) a thuairiscíonn go bhfuil siad róthrom nó murtallach, agus sciar níos mó d’fhir ná de mhná a deir amhlaidh. Tá fadhb an mheáchain níos forleithne i measc daoine níos sine ná i measc daoine níos óige.”

Gabhann an Phríomh-Oifig Staidrimh buíochas le freagróirí na suirbhéireachta. Gan a gcabhair siúd, ní fhéadfaí torthaí an lae inniu á fhoilsiú.

-- CRÍOCH --