Déileálfaidh an Phríomh-Oifig Staidrimh le gach eolas a bailítear sa daonáireamh faoi rún daingean agus is ar chúiseanna staidrimh amháin a úsáidfear é.
Ní dhéanfar ainmneacha na bpearsan aonair a iontráil in aon bhunachar sonraí ríomhaire.
Ní bheidh rochtain ag aon Roinn nó Oifig nó Gníomhaireacht Rialtais ar fhaisnéis inaitheanta a bhaineann le pearsana aonair nó teaghlaigh.
Tá rúndacht gach faisnéise a bhailíonn an Phríomh-Oifig Staidrimh ó phearsana aonair, teaghlaigh nó gnó, ráthaithe de réir dlí.
Oibríonn an PhOS mar "shráid aonbhealaigh" sa mhéid go dtagann sonraí inaitheanta isteach ach nach bhfágann siad an Oifig.
Cuirtear béim ar an ngá le rúndacht san oiliúint a fhaigheann foireann allamuigh agus cheannoifig na Príomh-Oifige Staidrimh.
Féadfaidh an pionós a fhorchuirtear i gcás aon sáraithe ag baill fóirne a bheith chomh hard le €25,000. Cuirtear gach ball foirne ar an eolas go hiomlán faoina ndualgais dleatha ina leith sin.
Tá an Phríomh-Oifig Staidrimh bródúil, go ceart, as an teist gan smál atá uirthi maidir le rúndacht sonraí a chosaint. Is é ceann dár bpríomhthosaíochtaí é an teist sin a chothú.
