Buntreoir ar Chuntasaíocht Éiceachórais

I gcomhthéacs téamh domhanda agus géarchéimeanna comhshaoil ​​atá ag dul i méid, tá an saol polaitíochta idirnáisiúnta ag iompú ar chreataí beartas comhshaoil ​​ar cheart go ligfidís dúinn forbairt inbhuanaithe a bhaint amach agus folláine an duine a mhéadú sna blianta amach romhainn. Tá ról le himirt ag cuntasaíocht éiceachórais i bhforbairt agus i monatóireacht beartais den sórt sin trí chur chuige uathúil  – peirspictíocht an éiceachórais – a thairiscint. Tomhaistear léi seo stoic éiceachórais agus a sreafaí seirbhísí i dtéarmaí fisiciúla agus airgeadaíochta mar aon lena stádas reachta agus faisnéis spásúil ar a mhéid agus a suímh geografacha. Tugtar forbhreathnú sa doiciméad seo ar Chuntasaíocht Éiceachórais mar aon le sainmhíniú ar éiceachórais agus an tábhacht a bhaineann leo.

Chun freastal ar riachtanais méadaithe náisiúnta agus idirnáisiúnta d’ábhair staidrimh oifigiúil maidir le héiceachórais, chruthaigh an Phríomh-Oifig Staidrimh (CSO) an Rannán um Chuntais Éiceachórais (RCÉ) in 2020. Tá sé de chúram ar an RCÉ cuntais éiceachórais na hÉireann a fhorbairt. Bunaithe ar chreat an SEEA-EA, oibríonn foireann an RCÉ le heagraíochtaí eile chun sraith modúl téamach a thiomsú, iad dírithe ar chineálacha sonracha éiceachórais. Beidh sé mar aidhm acu le gach modúl téamach faisnéis a sholáthar, ag brath ar na sonraí a bheith ar fáil, maidir le fairsinge spásúil, riocht agus seirbhísí an éiceachórais atá i gceist i dtéarmaí fisiciúla agus airgeadaíochta. Tabharfar na modúil seo le chéile ansin chun fairsinge, riocht agus seirbhísí na n-éiceachóras a chur ar fáil, mar aon le cuntais éiceachórais airgeadaíochta na hÉireann. Is cuspóir fadtéarmach é tacar cuimsitheach cuntas éiceachórais a thiomsú agus tá an mhodheolaíocht á forbairt faoi láthair.

Rachaidh obair seo an RCÉ chun leasa an CSO ar bhealach eile freisin, ag cur lena gcumas cuntais éiceachórais a thuairisciú ag leibhéal na hEorpa amach anseo ós rud é go bhfuil an Coimisiún Eorpach (Eurostat) ag obair ar mhodúl bailithe sonraí Cuntais Éiceachórais a thabhairt isteach.

An chéad chaibidil eile: Comhthéacs Ginearálta